Plantun de Prouvènço

Pèr coumpara dos planto d'encò nostre

Seseli tortuosum & Scleranthus annuus

Fenoui-de-Marsèio

Seseli tortuosum

Apiaceae Umbelliferae

Àutri noum : Fenoun-de-Marsiho, Grand-juvert.

Noms en français : Séséli tortueux, Séséli de Marseille.

Descripcioun :
Lou fenoui-de-Marsèio flouris à la fin de l'estiéu dins li relarg secarous, roucaious e bèn ensouleia. Au contro dóu fenoui, si flour soun blanco. Se destrìo dis àutri Seseli e se recounèis à si cambo en zigue-zague que dounon d'èr à-n-un pichot bouissoun.

Usanço :
Li grano fasien partido de la "teriaco", contro-pouisoun adouba pèr lis abouticàri rouman, de la farmacoupèio maritimo au siècle XVIIIen. Lis estùdi d'aro mostron d'efèt interessant contro li champignoun de la pèu.

Port : Erbo
Taio : 20 à 50(70) cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Seseli
Famiho : Apiaceae
Famiho classico : Umbelliferae

Coulour de la flour : Blanco
Petalo : 5
Ø (o loungour) enflourejado : 3 à 6 cm
Flourido : Estiéu - Autouno

Sòu : Ca
Autour basso e auto : Pancaro entresigna
Aparado : Noun

Liò : Tepiero seco - Garrigo - Roucaio
Estànci : Mesoumediterran à Subremediterran
Couroulougi : Éurimediterranenco
Ref. sc. : Seseli tortuosum L., 1753

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.